ციფრული გადაწყვეტილებები, რომლებიც პრაქტიკული ბიზნეს გამოცდილებიდან გაიზარდა

სამუშაოს გამარტივების სურვილიდან პროგრამულ გადაწყვეტილებებამდე

არჩილ ქათამიძე — Annovia-ს შემქმნელი

ჩემი ბიზნეს გზა ინდივიდუალური მეწარმის სტატუსით დაიწყო და დროთა განმავლობაში შპს The Optimistic Vision-ად ჩამოყალიბდა. Annovia ამ კომპანიის პროგრამული პროდუქტების, ციფრული გადაწყვეტილებებისა და ბიზნეს პროცესების ავტომატიზაციის მიმართულებაა.

როგორც ბუღალტერს, ხშირად მიწევდა დიდი მოცულობის მონაცემებთან, განმეორებით პროცესებთან და ხელით შესასრულებელ ამოცანებთან მუშაობა. პირველი ნაბიჯები იყო Excel ანგარიშები და მცირე ავტომატიზაციები, რომელთა მიზანიც დროის დაზოგვა და ინფორმაციის გამარტივება იყო.

შემდეგ მოვიდა უფრო რთული Excel მოდელები, Power Query, SQL მოთხოვნები და სხვადასხვა წყაროს მონაცემების ერთ სტრუქტურად გაერთიანება. აქ ჩამოყალიბდა მთავარი პრინციპიც: სამუშაო პროცესი ყოველთვის არ უნდა მოერგოს მზა პროდუქტს; ზოგჯერ უკეთესი პასუხია კონკრეტული საჭიროებისთვის შექმნილი ინსტრუმენტი.

რეზი ხუცაიძე

Annovia-ს ადრეულ ეტაპებზე ბევრი იდეა, გამოცდილება და სამუშაო მიდგომა რეზი ხუცაიძესთან ერთად ჩამოყალიბდა. G-File — General File-ის სახელდების ტრადიციაც ამ პერიოდიდან მოდის, და Annovia-ს სახელის იდეის ჩამოყალიბებაშიც ეს ერთობლივი ფიქრი მნიშვნელოვანი იყო. ჩვენი პროფესიული გზები დღეს ცალ-ცალკე გრძელდება, თუმცა მისი წვლილი ამ ისტორიაში უცვლელად მნიშვნელოვანია.

Excel ანგარიშებისა და მონაცემთა დამუშავების შემდეგ შემდეგი ნაბიჯი შიდა პროგრამებისა და ვებსისტემების შექმნა გახდა. დღეს Annovia ქმნის როგორც მცირე მიზნობრივ ინსტრუმენტებს, ისე ვებპლატფორმებს, ინტეგრაციებსა და სრულ ბიზნეს სისტემებს. პრინციპი იგივე რჩება: შევქმნათ იმდენი ტექნოლოგია, რამდენიც რეალურ ამოცანას სჭირდება.